Oktober ischt

Oktober ischt, as Loob leuchtat bunt

I da warme, goldana Sunnastrahla.

Da Moscht ischt o scho guat vrgora,

Es freut di Alta und di Goba.

Und das Obscht ischt rief in großr Zahl,

Uf an Hirbschtmarkt o a jeder kunnt.

 

Jetzt hoaßt as s' letschte Mol id Bergschua schlüfa

Und dur a Wald und vorbei a Rüfa

Noch amol dia Bergluft gnüaßa.

Da Blick, der ischt jetzt so klar und wit,

Wia sus zu koanara andera Zit.

Tua s' Land vo oba begrüaßa.

 

D' Katz, dia heat bald widr Junge,

Ma woaß es wörand wohl reacht fule,

Wills nur da warma Ofa kennand

Und net duss umanandr reannand.

D' Johreszit ischt o a Schule,

S' Kannapee kriagt denn a Kule.

 

Dr Hirbscht, der heat an ganz oagana Duft,

Viel würzigr ischt uf oamol d' Luft.

Nooch und nooch würd's denn immer kahler,

D' Farba sind weak, s' luagt us all fahler.

Ma denkt no lang a dia goldana Täg,

Wenn dr Schnee deckt zua Wiesa und Häg.